සිහින දකින්නෝ...
බිළිඳකු මෙලොව
එළිය දකින්නේ කිසිවක් නොදැනය. හය හතර තේරීමට පටන් ගන්නා වියේ සිටම වැඩිහිටියෝ ඔහුට
සිහින දකින්නට කියා දෙති. ඒ නින්ද්‍රාවෙන් සිහින දකින්නට නොව සැබැවින්ම ජීවිතය
දිනා ගැනීමට අපේක්ෂා කරන සිහිනයන් දැකීමටය. සෑම අයෙකුම එක් සිහිනයක් හෝ සිහින
කිහිපයක් තම සිත්හි දරයි. එබැවින් අපි සියල්ලෝම සිහින දකින්නෙමු.
බලාපොරොත්තු
පොදි බැඳන් තම ආශාවක් ඉෂ්ට කර ගැනීමට තැත් කරන්නාට එය ඉටු කර ගන්නා තුරු ඉවසිල්ලක්
නොමැත. තම හීනය කරා ළඟා වනතුරු ඔහු හෝ ඇය තුළ පවතින්නේ නොතිත් ආශාවකි. මෙරට අධ්‍යාපන
ක්‍රමයේ විභාග ක්‍රමය දෙස විමසූ විට ශිෂ්‍යත්වය සමත් වීමට, සාමාන‍්‍ය පෙළ විභාගය
සමත් වීමට, උසස් පෙළ සමත් වීමට සහ සරසවි වරම් ලැබීමට අධ්‍යාපනය හදාරන්නන් තුළ
පවතින සිහිනයන්ය. ඉන්පසුව ඇත්තේ රැකියාවක් කිරීමේ හීනයකි. නමුත් වර්තමානයේදී
උපාධිධාරීන් ද සිටින්නේ තම රැකියා සිහිනය ඉටු කර ගැනීමට නොහැකිවය. මෙය මහත් බරපතල
අර්බුදයකි. වසරකට විශ්‍රාම යන ප්‍රමාණයට සාපේක්ෂව රැකියා සඳහා බඳවා ගන්නා ප්‍රමාණයක්
ද පැවතිය යුතුය. එසේම ඒ සඳහා යම් ක්‍රියා පටිපාටියක් තිබිය යුතුය. නමුත් එය සිදු
නොවීම මහත් ගැටලුවක් වී ඇත.
ඇතැම්
පුද්ගලයෙක් තම අධ්‍යාපනය නිසි අයුරින් නිම කරවා රැකියාවක නියැලීමේ අරමුණින්
නොසිටී. ජීවන බර කර මතට ගැනීමට ඔවුන් පසුබට නොවන්නේ සමාජමය, පුද්ගලබද්ධ,
සංස්කෘතිකමය, ආර්ථිකමය ආදී විවිධ කරුණු කාරණා හේතුවෙනි. හීනයන් කරා ළඟා වීමට අත්
උදව් සපයන්නන් සීමිතය. නමුත් එවැනි වන සිවුපාවුන් මධ්‍යයේ දෙවි දේවතාවුන් ද නැත්තේ
නොවේ. අධිෂ්ඨානය, වීර්යය, උත්සහය, කැපවීම ආදී සියල්ල යෙදවූවත් සිහිනය කරා ළඟා වීමට
වාසනා ගුණ මහිමය ද තිබිය යුතු යැයි පැවසේ. සිහින තරුවක්, සිහින කුමාරියක්, සිහින
කුමාරයෙක් වීමද ප්‍රබල මෙන්ම ජනප්‍රිය හීනයන්ය. අතීතයේ පටන් නායකත්වය දිනීමට සිහින
මැවූවෝ සිටියහ. එය අදටත් එසේමය. සිහින මැවීමත් සිහින දැකීමත් සර්වකාලීන, සර්ව
පුද්ගලබද්ධ මෙන්ම සර්ව භෞමික කාරණාවක් බැව් පසක් වන්නේ එබැවිනි.
No comments:
Post a Comment
Thank You!